Қудратиллонинг рақиби бўлиши кутилган Липинец нокаутга учради

Оқшом доирасидаги қизиқарли жанглардан бири ярим ўрта вазн тоифасида ўтказилиб, унда россиялик 32 ёшли Сергей Липинец америкалик Жейнер Эннисга қарши рингга кўтарилди. Кутилмаганда собиқ IBF чемпиони ҳисобланган Липинец жангнинг олтинчи раундида Эннисга нокаут билан ютқазди. У тўртинчи раундда нокдаун ҳолатига ҳам тушиб қолганди. 

Шу тариқа, Сергей Липинец фаолиятидаги иккинчи мағлубиятини қарши олди. Унинг ҳисобида 16 (12 нокаут) ғалаба бор. Эннис эса ғалабалари сонини 27 тага етказиб олди. Жангларнинг 25 тасида рақибларини муддатидан аввал мағлуб этган. 

Эслатиб ўтамиз, 2020 йилнинг октябрь ойида ўтказилган Липинец ҳамда канадалик 33 ёшли Кастио Клейтон (18-0, 12 КО) ўртасидаги жангда дуранг натижа қайд этилганди. Ўша жанг ғолиби вақтинчалик IBF чемпионини аниқлаб бериши керак эди. Аслида ўша жангда ҳамюртимиз Қудратилло Абдуқаҳҳоров Сергей Липинецга қарши рингга кўтарилиши лозим эди, аммо виза муаммоси сабаб чарм қўлқоп устамиз АҚШга белгиланган вақтда етиб бора олмаганди.