Қувайсойда «Водий тулпорлари» от спорти мажмуаси очилди

У ерда асосан ҳарбийлар ва “Ватанпарвар” тизими ходимлари учун отлар тайёрланади. Мажмуа 2,5 гектар майдонда жойлашган. Бу ерда замонавий дренаж тизимига эга очиқ ва ёпиқ манежлар қад рослаган бўлиб, солярий барча керакли жиҳозлар билан таъминланган. Бундай иншоотлар учун сифатли “қум” жуда муҳим. Майдон Навоий вилояти “Жерой”дан келтирилган кварц қуми билан қопланган. Демак, мажмуа нафақат миллий, балки ҳалқаро даражадаги мусобақаларни ҳам қабул қила олади.

Учта отхонанинг бири ёш йилқилар учун мўлжалланган, бу ерда отларни сифатли парвариш қилиш учун барча қулайликлар мавжуд. Оғилхонадаги суғоргич, охур ва бошқа барча жиҳозлар чет элдан келтирилган. Спорт ўйинлари учун тўсиқлар мамлакат корхоналари томонидан ҳалқаро стандартларга мос равишда ишлаб чиқарилган.

Ажойиб жониворларнинг мажмуа ҳудудида қулай шароитда бўлиши учун бу ерда махсус бассейн ва қумли от йўрттиргич бор. Бу эса бўлажак “ҳарбий отлар”га доимо яхши кўринишда қолишларига кўмаклашади. Жониворларнинг саломатлигини кузатиш ҳам қийинчилик туғдирмайди, чунки барча керакли жиҳозлар (УЗИ аппарати ва қон таҳлили шулар жумласидан) билан таъминланган лаборатория мавжуд.

Очиқ манеж атрофида 180 ўринли трибуна ва олтита шийпонча жойлашган, у ердан майдоннинг ажойиб кўриниши очилади.

«Водий тулпорлари» мажмуаси қурилиши “Кварц” АЖ маблағлари эвазига амалга оширилди. Акционерлик жамияти мутахассислари от мажмуаси имкониятларини кенгайтиришни, фаолият жараёнига етакчи иш усулларини тадбиқ қилишни ният қилишган. Масалан, яқин келажакда мажмуадаги отлар Ўзбекистоннинг ажойиб гўшаларида сайёҳларга хизмат кўрсатишга тайёр бўлишади.

Тадбирда Ўзбекистон Республикаси Бош Вазири ўринбосари, Ўзбекистон йилқичилик ва от спорти федерацияси раиси З.Мирзаев ва Фарғона вилояти ҳокими Ш.Ғаниев иштирок этишди.