RAF лигаси жанжалга сабаб Арман Царукян бўйича ўз қарорини эълон қилди

Ташкилот асли арманистонликнинг бу қилмиши учун ҳеч қандай санкция қўллашни режалаштирмаяпти ва у билан ҳамкорликни давом эттиришга умид қилмоқда. Айнан Пуллас аввалроқ Царукян у билан реванш беллашувини ўтказмагунча RAF`да бошқа гиламга чиқмаслигини айтган эди.

"Биз Арман Царукянни четлатмадик, - деди RAF асосчиларидан бири Чад Бронштейн MMA Fighting нашрига берган интервьюсида. - Арман ҳар доим турнирларимизда яхши чиқиш қиларди. Биз у билан ҳеч қачон муаммоларга дуч келмаганмиз ва менимча, бу ҳолат рақиб ҳамда ушбу жангнинг тажовузкорлиги туфайли юзага келди".

Бронштейн, шунингдек, Царукян ва Пуллас RAF`нинг навбатдаги тадбирларидан бирида реванш жангини ўтказишига ишонч билдирди ва яна бир оммавий муштлашувга йўл қўймаслик учун барча зарур хавфсизлик чораларини кўришга ваъда берди.

Эслатиб ўтамиз, 28 февраль куни Арман Царукян Жоржио Пулласни очколар бўйича 5:3 ҳисобида мағлуб этганди. Жанг давомида Пуллас тажовузкор ҳолатда рақибига зарбалар берди ва камида бир марта унинг кўзига бармоқларини суқиб олди. Царукян ҳам камида бир марта Пулласнинг юзига кафти билан зарба берди.

Беллашув тугагани ҳақида сирена берилгач, Царукян Пулласни йиқитиб, жағига мушт туширди, кейин тиззаси билан яна бир зарба берди. Шу пайт иккала курашчи жамоаси аъзолари супага сакраб чиқиб, муштлашув уюштирган, унинг видеолари кейинчалик ижтимоий тармоқларда кенг тарқалганди.