18 янв 11:44
Янгиликлар

Спорт курашлари

RAF Лигаси яна бир Олимпиада чемпиони билан шартнома имзолади

Американинг Real American Freestyle профессионал кураш лигаси ўз сафига машҳур курашчиларни қўшиб олишда давом этмоқда.

Бу сафар Лига грузиялик эркин курашчи, Рио-2016 Олимпиадаси чемпиони, Лондон-2012 Олимпия ўйинларининг кумуш медали соҳиби Владимир Хинчегашвили билан шартнома имзоланганини расман эълон қилди. Хинчегашвилидан аввал икки карра Олимпиада ва жаҳон чемпиони, россиялик 29 ёшли Абдулрашид "Танк" Садулаев ҳам RAF лигаси билан шартома имзолаган эди.

"Яна бир Олимпиада чемпиони билан шартнома имзоланди. 2012 йилда кумуш, 2016 йилда олтин. Владимир Хинчегашвили RAF лигасида", - дейилади ташкилотнинг ижтимоий тармоқлардаги саҳифасида.

Маълумот учун, 34 ёшли Владимир Хинчегашвили Лондонда эркин кураш бўйича 55 килограммгача бўлган вазн тоифасида Олимпия ўйинларининг кумуш медалини қўлга киритган. Орадан тўрт йил ўтиб Рио-де-Жанейрода 57 килограммгача бўлган вазнда Олимпиада чемпиони бўлган. Шунингдек, грузиялик курашчи жаҳон чемпионати ғолиби ва уч карра Европа чемпиони ҳисобланади.