RAF Қозоғистондаги турнирини расман эълон қилди. Рўйхатда Ўзбекистон ҳам бор!

RAF Moscow турнири олдидан ўтказилган матбуот анжуманида Лига Қозоғистон, Ўзбекистон, Тожикистон, Ҳиндистон, Хитой каби бир қатор мамлакатларда турнирлар ўтказилишини расман эълон қилди. 

Ташкилотчиларнинг сўзларига кўра, ушбу ҳамкорлик дунёнинг энг яхши курашчиларига мусобақалар учун глобал платформа тақдим этиш, мухлисларга эса жаҳон юлдузлари иштирокидаги унутилмас шоуларни тақдим этишни мақсад қилган.

Real American Freestyle (RAF) лигасида Қозоғистон шарафини эркин кураш бўйича жаҳон чемпиони Ризабек Айтмухан, шунингдек, машҳур ММА жангчилари Асу Алмабаев ва Қуат Хамитов ҳимоя қилмоқда. Лига турнирларида UFC юлдузлари, жумладан, чемпион Мераб Двалишвили, собиқ чемпион Хамзат Чимаев, россиялик жангчи Арман Царукян ва бошқа таниқли спортчилар иштирок этишади.

Ўзбекистонда эса шу кунгача эркин курашчиларимиз - Париж-2024 Олимпиадаси чемпиони Разамбек Жамалов ҳамда Токио-2020 Олимпия ўйинлари совриндори Бекзод Абдураҳмонов RAF турнирида иштирок этган.   

АҚШдан ташқарида RAF бугунги кунга қадар Тбилиси (Грузия) шаҳрида йирик турнирлар ўтказди, шунингдек, Москвада (Россия) ҳам кенг кўламли шоу ўтказишни режалаштирган.