Раҳматжон Рўзиохунов Ўзбекистон чемпионати, Баҳодир Жалоловнинг навбатдаги жанги ҳақида гапирди

- Бир неча кундан сўнг Ўзбекистон чемпионати старт олади. Мамлакат биринчилигида қайси машҳур боксчиларимизни кўришимиз мумкин? 

- Ўзбекистон чемпионатида барча юлдузларни кўрамиз. Ҳасанбой Дўсматовдан тортиб, ҳамма машҳур боксчиларни. Кимки ўзини Ўзбекистонда бўлиб ўтадиган жаҳон чемпионатида ва Париж мезбонлик қиладиган Олимпиадада кўришни хоҳласа ҳаммаси қатнашади. Чунки биз олдинда турган жаҳон чемпионатига боксчиларимизни саралаб олиб, тайёргарликни бошлашимиз керак. 

- Осиё чемпионатида Лазизбек Муллажонов ажойиб ғалабани қўлга киритди. Париж Олимпиадасида ҳам Муллажоновга ишонч билдириладими?

- Албатта, унга ишонамиз. Муллажоновни Баҳодир Жалоловнинг ўрнини боса оладиган боксчи деб биламиз. Лекин ҳозирги кунда Жалолов биринчи рақамли спортчи ва биз уни жаҳон чемпионати ҳамда Олимпия ўйинларидаги иштирокини ҳали кўриб чиқяпмиз. IBA -100 кг вазнни ҳам қўшмоқчи. Агар ушбу вазн қўшиладиган бўлса иккиси ҳам иштирок этади. Албатта биз шуни хоҳлардик. 

- Бир неча кундан сўнг Баҳодир Жалоловнинг проф боксдаги навбатдаги жанги бўлиб ўтади. Рақиб анча кучли дея қаралмоқда. Жалолов қисқа муддат ичида тиклана оладими?

- Бу ҳақда ҳали Тўлқин Қиличев билан гаплашганимиз йўқ. Чунки улар яқинда Америкадан учиб келишди. Ўйлайманки, уларнинг тактикаси тўғри бўлди. Сабаби Баҳодирнинг ҳозирги формасидан фойдаланиш керак. Америкада мураббийлар томонидан қўйилган мақсадга эришилмади деб ўйлайман. Абу-Дабида бўладиган жангни қийинроқ деб ҳисоблайман. Бунинг сабаби Олимпия ўйинлари йўлланмасини тақдим этувчи турнирда бу икки боксчи учрашишган ва унда Жалоловни қўли баланд келган. Жалоловни рақиби жуда яхши спортчи. Менимча, жуда чиройли жанг бўлиб ўтади.