Раҳмонов - Махачев, Жонс - Аспиналл ва 2025 йилда бўлиб ўтиши керак бўлган жанглар

Лекин, шундай жанглар борки, уларни барча кутмоқда. 

Қуйида 2025 йилда кутилаётган энг қизиқарли жанглар рўйхати билан танишинг: 

Илия Топурия – Алекс Волкановски (ёки Мовсар Евлоев)

Бир қарашда, бу ғалати вариантдек туюлиши мумкин. Чунки биринчи жангда Топурия нокаут билан ғалаба қозонган бўлса, реваншни кўриш қизиқ бўлармиди?

Аслида, ҳали ҳам интрига сақланиб қолган. Савол шундай: ҳақиқатан ҳам, бир пайтлар P4P рейтингининг энг яхши жангчиси бўлган Волкановски энди кучсиз бўлиб қолдими? Кўпчилик 2023 йилдаги мағлубиятини Махачевдан учралган оғир нокаут билан боғлаганди. Бундай зарбалардан тикланиш учун жангчиларга ярим йил вақт керак бўлади, лекин Волкановски тўрт ойда қайтиб келди. Энди у тўлиқ тикланган, жароҳатларини даволаган ва яна октагонга қайтишга тайёр. Топурия бундай Волкановскига қарши кураша олармикин? Кўпчилик "ҳа" дейди.

Агар бу жанг амалга ошмаса, Топурия ва Евлоев тўқнашуви қизиқ бўларди. Улар 2022 йилдаёқ жанг қилиши керак эди, аммо жанг бекор қилинганди. Ҳозир Топурия чемпион, Евлоев эса рейтингда тўртинчи. Агар улар ҳозир жанг қилмаса, балки ҳеч қачон учрашишмас. Чунки, Топурия енгил вазнга кўтарилишни режалаштирмоқда. Шу боис, у Евлоев билан жанг қилиб, дивизионни "тозалаши" мантиқан тўғри бўларди.

Билол Муҳаммад – Шавкат Раҳмонов

Бу жанг 2024 йил декабрдаги UFC 310 турнирида бўлиши керак эди, лекин Муҳаммаднинг жароҳати туфайли бекор қилинди. Раҳмонов эса Иан Гэррига қарши жанг қилди ва ғалаба қозонди. Ҳозир унинг чемпионлик жангига ҳеч қандай тўсиқ қолмади. Масала фақат ушбу жангнинг қачон бўлишида қолган.

Раҳмонов барча жангларида устунлик қилган, лекин Гэррини нокаут қила олмагани сабабли, Билолга қарши жанг учун қизиқиш янада ошиб кетди. UFC 310 олдидан кўпчилик Раҳмоновга камарни олдиндан "бериб қўйган" эди. Аммо ҳозир интрига кучайди. Бу йилнинг энг томошабоп жанги бўлмаслиги мумкин, аммо у кескин курашларга бой бўлиши аниқ.

Дрикус Дю Плесси / Шон Стриклэнд – Хамзат Чимаев

UFC 312 турнирида Дрикус Дю Плесси камарини Шон Стриклэнддан ҳимоя қилади. Бу жуфтликда ғолиб чиққан жангчи, эҳтимол, навбатдаги рақиб сифатида Хамзат Чимаевга тўқнаш келади. Чимаев 2024 йил октябрида Роберт Уиттакерни енгиб, расмий равишда биринчи рақамли даъвогарга айланган.

Чимаев чемпионлик жангига муносиблиги ҳақида кўплаб мунозаралар бўлганди, аммо Уиттакерни енггач, бу борадаги шубҳалар йўқолди. Фақат бир савол бор: жанг қаерда ва қачон бўлади? Катта эҳтимол билан ёзда Саудия Арабистонида ёки кузда Абу-Дабида ўтказилади. Тўқнашув АҚШда бўлиши эҳтимоли жуда кам. Бир нарса аниқ: Чимаев чемпионлик учун жанг қиладиган навбатдаги жангчидир. Бу кам учрайдиган ҳолат – бу сафар чемпион даъвогарни кутмаяпти, балки даъвогар чемпионни кутмоқда.

Алекс Перейра – Магомед Анкалаев

Бу ярим енгил вазндаги энг қизиқарли тўқнашувлардан бири. Перейра – чемпион, Анкалаев эса биринчи рақамли даъвогар. Анкалаев рейтингдаги барча рақибларини енгиб, "дивизионни тозалаган". Улар 8 март куни жанг қилишлари эса аллақачон анонс қилинган. 

Жон Жонс – Том Аспиналл

Бу UFC'даги энг кутилган жанглардан бири бўлади. Матбуот анжуманларида Дана Уайтдан бу жанг ҳақида сўрашлари ҳам бу қизиқишнинг юқори эканини кўрсатади.

Бу жанг тажриба ва ёш, куч ва айёрлик, жангчилик интеллекти ва нокаутчи кучи ўртасидаги тўқнашув бўлади. Жонс 2024 йилнинг ноябрида Миочични енгди, аммо бу натижадан кўпчилик ҳайрон қолгани йўқ. Ҳамма унинг Аспиналлга қарши жангини кутаяпти. Том эса Жонсни "қўрқоқликда" айблашда давом этмоқда.

Бу жанг бўладими? Дана Уайт "ҳа" деган. Лекин Жонс бу жангни унчалик хоҳламаётгани кўриниб турибди. UFC Жонсни бу жангга рози қилиш учун етарлича катта таклиф бера оладими? Буни тез орада биламиз.

Пётр Ян – Кори Сэндхэген / Шон О'Мэлли

Пётр Ян 2024 йилни яхши ўтказди. У кетма-кет учта мағлубиятдан сўнг икки тажрибали жангчини мағлуб этди. Энди у яна чемпионликка даъвогар бўла олади.

Ҳозир Ян рейтингда иккинчи ўринда. Ундан олдин Шон О’Мэлли бор. Пётр О'Мэлли билан 2022 йилда жанг қилган ва баҳсли тарзда мағлуб бўлган. Реванш мантиқан тўғри, аммо О'Мэлли бунга рози бўладими?

Агар О'Мэлли бу жангни қабул қилмаса, Янга Кори Сэндхэген тўғри келади. Улар 2021 йилда жанг қилишган ва Ян яққол устунлик билан ютган. Бу эса унинг яна бир бор бу жангга рози бўлиши эҳтимолини оширади.

Ислам Махачев – Шавкат Раҳмонов

Махачев яримўрта вазн тоифасига ўтиб, у ерда ҳам камар олишни хоҳлайди. Бироқ бу жанг амалга ошиши учун бир неча эҳтимоллар амалга ошиши керак. 

Биринчиси – Раҳмонов Билол Муҳаммадни мағлуб этиши керак. Ислом ва Билол ўзаро жанг қилмайди. Демак, Шавкат чемпион бўлса, бу жанг рўй бериш эҳтимоли ортади.

Бу жангнинг бўлиши эҳтимоли 50/50. Агар барча эҳтимоллар амалга ошса, бу жанг 2025 йил охирларига келиб амалга ошиши мумкин. Бу жанг кутишга арзийдиган қарама-қаршилик ҳисобланади.

Сиз кўпроқ қайси жангни кутяпсиз?