Рапқон қишлоғида бокс бўйича халқаро турнир ўтказилади

Ҳар йили анъанавий тарзда ўтказилаётган мазкур мусобақа жорий йилда 2005-2006 йилларда туғилган ўсмирлар ўртасида Ўзбекистон Республикасининг Мустақиллигининг 28 йиллигига бағишлаб, “Жонажон Ўзбекистоним, мангу бўл омон!” шиори остида ташкил этилмоқда.

Жисмоний тарбия ва спорт вазирлиги, Ўзбекистон Миллий олимпия қўмитаси ва мамлакат бокс федерацияси ҳамкорлигида ташкил этилаётган мусобақага Россия, Польша, Молдова, Қозоғистон, Қирғизистон, Тожикистон, Туркманистон давлатлари ҳамда республикамизнинг барча ҳудудларидан ташриф буюрган жами 250 нафардан ортиқ боксчилар иштирок этиши кутилмоқда.

Мусобақада иштирокчилар 18 та вазн тоифасида рингга кўтариладилар.

Маълумот учун, Рапқон бокс мактаби тарбияланувчилари юртимиз шарафини халқаро ареналарда муносиб ҳимоя қилиб келишмоқда. Шоҳжаҳон Эргашев, Муроджон Ёқубов ва Азиз Раҳмонов каби машҳур боксчиларимиз ушбу мактаб тарбияланувчилари ҳисобланади.