Расман. Абдумалик Халоков WBC'нинг Riyadh Season билан ҳамкорликдаги бокс мусобақасида иштирок этади

Халоков гран-прининг ярим енгил вазн тоифасидаги беллашувларида иштирок этади.

"WBC турнирида қатнашадиган бўлдим. 5 та жанг WBC камари учун бўлиб ўтади. Ин Ша Аллоҳ, WBC камарини Ўзбекистонга олиб келишга ҳаракат қиламан", деб ёзган Абдумалик ўзининг ижтимоий тармоқлардаги саҳифасида.

Маълумот учун, Мусобақа доирасида тўртта вазн тоифасида жами 128 нафар боксчи қатнашади. Турнир ярим енгил, биринчи ярим ўрта, ўрта ва супероғир вазн тоифасида ўтказилади. Жанглар 1/16 финалдан бошланади ва 6 раунддан иборат бўлади. Финал жанглари эса 8 раундлик бўлади. 

Жангларда 26 ёшдан кичик бўлган боксчилар қатнашади. Улар проф боксда 15 тадан кўп жангда қатнашмаган бўлиши керак. Боксчилар WADA протоколи бўйича тасодифий допинг тестидан ўтказилади. 

Эслатиб ўтамиз, 24 ёшли Абдумалик Халоков 27 февраль куни Испаниянинг Севилья шаҳрида ташкил этилган проф бокс оқшоми доирасида Венесуэла вакили Марлемброн Акуньяни техник нокаут орқали мағлуб этиб, проф боксдаги иккинчи жангида иккинчи ғалабасини қўлга киритган эди.