Расман: Чемпион Леон Эдвардснинг жанги тасдиқланди

Британиялик чемпион 27 июль куни Манчестер шаҳрида ўтказиладиган UFC 304 турнирида октагонга қайтади. Ўша куни у дивизион рейтингининг иккинчи поғонасидан жой олган америкалик Белал Муҳаммадга қарши октагонга чиқади. 

Маълумот учун, бу реванш мақомидаги жанг бўлади. Эдвардс ва Муҳаммад 2021 йилнинг март ойида ўтган жанги ўтказилмаган дея топилганди. Боиси, жангнинг иккинчи раундида британиялик аралаш яккакураш устаси рақибининг кўзига қўлини тиқиб олганди. Бунинг натижасида Белал жангни давом эттира олмаган эди.  

Эслатиб ўтамиз, 32 ёшли Леон Эдвардс ўтган йилнинг декабрь ойида Лас-Вегасда ўтган UFC 296 турнирида Колби Ковингтонни очколар ҳисобига кўра мағлубиятга учратиб, ўз чемпионлик камарини муваффақиятли ҳимоя қилганди. 35 ёшли Белал Муҳаммаднинг охирги жангини ўтказганига бир йил бўлди. Ўтган йили у май ойида Гилберт Бернсни мағлуб этиб, қаторасига бешинчи ғалабасини тантана қилганди.