Расман. "Ҳумо" бу мавсум қайси чемпионатда иштирок этишини эълон қилди

"Ҳумо" жорий йилги мавсумда ҳам Қозоғистон чемпионатида иштирок этади. Бу ҳақда жамоа матбуот хизмати хабар берди.

"Ҳурматли «Ҳумо» жамоаси ва барча хоккей мухлислари! Оғир ва баҳсли мавсум якунидан кейинги қисқа танаффусдан сўнг яна сизлар билан биргамиз. 

Янги "Про Хоккей Лигаси" мавсумига тайёргарлик кўриш жараёнида воқеалардан доимо ҳабардор бўлишингиз учун сизларга энг муҳим клуб янгиликларини тақдим этишда давом этамиз. 

Муҳим янгиликларидан бири – «Ҳумо» жамоасининг 2024-2025 йилги мавсумда мураббийлар штабига Дмитрий Катаев бошчилик қилади! Ўтган мавсумда Дмитрий Владимирович бошчилигидаги Кўкшетаунинг «Арлан» жамоасини мавсум чемпиони ва Кубок ғолибига айлантирган. 

«Ҳумо» таркиби мавсумлар оралиғида жиддий равишда янгиланиши кутилмоқда. Жамоа ўз ўйин услубини ўзгартиришга интилмоқда. Айни пайтда клуб янги ўйинчилар билан тўлдирилди, жумладан, Чемпионатнинг амалдаги ғолиби «Арлан» жамоаси ҳужумчиси - Артём Лихотников ва ҳимоячиси Иван Степаненко. 

Жамоанинг мавсумолди машғулотларини бошлаш учун йиғилиши 5-7 июль кунларига белгиланган", дейилади жамоа хабарида.