Расман! Ислам Махачевнинг навбатдаги чемпионлик ҳимоя жанги эълон қилинди + ПОСТЕР

Россиялик аралаш яккакураш устаси аввал хабар берилганидек, 18 январь куни АҚШнинг Лос-Анжелес шаҳрида ташкил этиладиган рақамланган UFC 311 турнирининг марказий жангида рейтингда биринчи ўринни эгаллаб турган камар учун мажбурий даъвогар Арман Царукянга қарши октагонга кўтарилади. 

Россиялик аралаш яккакураш усталари ўртасидаги иккинчи жанг UFC промоушени томонидан расман эълон қилинди. Бу Арман учун реванш мақомидаги жангга айланади. Ислам шу йилнинг июнь ойида учинчи чемпионлик ҳимоя жангини ўтказганди. UFC 302 турнири доирасида у америкалик Дастин Порьени бешинчи раундда мағлубиятга учратган эди.

Арман Царукян эса апрель ойида Лас-Вегасдаги юбилей UFC 300 турнирида дивизионнинг собиқ чемпиони бразилиялик Чарльз Оливейрани ҳакамларнинг айри қарори эвазига таслим этганди. Бу даъвогарлик мақомидаги жанг эди. 2019 йилнинг апрель ойида Арман Царукян UFC`даги дебют жангини айнан Ислам Махачевга қарши ўтказиб, ҳакамларнинг якдил қарори билан ютқазганди. Ўшанда Царукян қисқа муддатда Исламга қарши жанг учун розилик берганди.