Расман! Кураш Ислом Бирдамлик ўйинлари 2025 дастурига киритилди

Жаҳон спортинг энг нуфузли спорт ташкилотларидан бири ҳисобланган ISSAнинг йиғилишида Халқаро Кураш ассоциацияси Президенти Ҳайдар Фармон ҳам иштирок этди. Ушбу ассамблея давомида у ISSA Президенти шаҳзода Абдулазиз Бин Турки Ал-Файсал ва Бош котиб жаноб Носир Мажали билан музокаралар олиб борди. 

Музокараларда ISSA Президенти Кураш исломий қадриятларга мос энг олийжаноб спорт тури эканлигини эътироф этди. Кураш Ислом Бирдамлик ўйинларининг бир қисмига айланганлигини мамнуният билан эълон қилди.

2025 йилда Саудия Арабистонининг Ар-Риёд шаҳрида бўлиб ўтадиган Ислом бирдамлик ўйинларида Кураш бўйича расмий беллашувлар ҳам ўтказилади. Учрашув давомида Ислом халқлари ўртасида курашни янада ривожлантириш, таълим ва тарғибот йўналишларида бир қатор вазифаларни бажариш каби мажбуриятлар келишиб олинди.

Ушбу жараённинг бир қисми сифатида тез орада IKA техник директори ISSA Техник департаменти билан ҳамкорликда мусобақа учун вазн тоифалари ва бошқа техник тафсилотларни якунлаш бўйича учрашувлар белгиланди.

2025 йилги Ислом бирдамлик ўйинлари Саудия Арабистони Подшоҳлиги томонидан ўтказилади ва бу қарор бутун дунё кураш жамоатчилиги учун катта ютуқдир. Бутунжаҳон Кураш оиласини янги йил арафасида Кураш спортини Ислом Бирдамлик  ўйинлари Дастурига расман киритилганлиги билан самимий табриклаймиз.