Расман. Рамазон Темиров октагонга чиқадиган турнирнинг асосий жанги тасдиқланди + ПОСТЕР

Ташкилотчилар ушбу оқшомнинг асосий жангини расман тасдиқлашди. Унда ўта енгил вазн тоифаси вакили (57 килограммгача) қозоғистонлик Асу Алмабаев португалиялик Манель Капега қарши октагонга чиқади. Асу жароҳат олган Брэндон Ройвалнинг ўрнига Манель Капега қарши жанг қилиши айтилганди. Ушбу хабар расман ўз тасдиғини топди.

Шу тариқа, UFC промоушени раҳбарлари Капе иштирокидаги турнирнинг асосий жангини сақлаб қолишди. Қозоғистонлик 31 ёшли аралаш яккакураш устаси мағлубиятсиз серия билан келмоқда. У UFC октагонида 4 та ғалаба қайд этган. Охирги жангида Матеус Николауни очколар ҳисобига кўра мағлубиятга учратганди. Манель Капе эса ўтган йилнинг декабрида Бруно Сильвани учинчи раундда техник нокаут эвазига таслим этганди. 

Айни пайтда Манель Капе ҳамда Асу Алмабаев мос равишда ўта енгил вазн тоифаси рейтингида олтинчи ва саккизинчи ўринларни банд этган. Алмабаев UFC турнирларининг марказий баҳсида октагонга чиққан илк қозоғистонлик жангчига айланади. 

Эслатиб ўтамиз, ҳамюртимиз Рамазон Темиров ҳам шу оқшомда ўзининг промоушендаги иккинчи жангини ўтказади. У айнан Асу билан битта вазн вакили ҳисобланади. Ғалабали серия давом этса, икки қўшни жангчилар октагонда бир-бирларига қарши тўқнаш келиб қолишлари мумкин.