Расман! Собиқ UFC чемпиони Дейвисон Фигейредунинг жанги ҳам тасдиқланди + ПОСТЕР

Аввал хабар берганимиздек, бразилиялик аралаш яккакураш устаси эквадорлик Марлон Верага қарши октагонга чиқади. Ушбу жанг 3 август куни БАА пойтахти Абу-Даби шаҳрида ташкил этиладиган UFC Fight Night турнири доирасида бўлиб ўтади. Бу хабарни шахсан UFC раҳбари Дана Уайт тасдиқлади. 

Эслатиб ўтамиз, Фигейреду ҳисобида 23 ғалаба, 3 мағлубият ва 1 дуранг бор. У сўнгги жангини юбилей UFC 300 турнири доирасида Коди Гарбрандтга қарши ўтказиб, рақибини бўғиш усули эвазига мағлубиятга учратганди. Айни пайтда Дейвисон 2 та ғалабали серия билан келмоқда. 

Ўз ўрнида Марлон Вера сўнгги жангини чемпион Шон О'Мэллига қарши ўтказиб, рақибига имкониятни бой бериб қўйганди. Бу Шон учун реванш мақомидаги жанг эди. Уларнинг илк жангида Марлон ғалаба қозонган эди. Веранинг ММАдаги рекорди - 21 ғалаба, 9 мағлубият ва 1 дуранг.