Расман: Тошкент пара енгил атлетика бўйича ЖЧ-2027`га мезбонлик қилади

Мазкур нуфузли мусобақа нафақат Ўзбекистон, балки Марказий Осиё ҳудудида илк бор ўтказилади.

Дунё биринчилиги 2027 йилнинг июнь ойида пойтахтимиздаги "Олимпия шаҳарчаси"да жойлашган "Олимпия" стадионида бўлиб ўтади.

Тошкент-2027 мусобақаси тартиб бўйича ХIII пара енгил атлетика Жаҳон чемпионати ҳисобланади. Ушбу мусобақа Осиё қитъасида бешинчи маротаба ташкил этилади. Аввалги мезбонлар қаторида Доха (2015), Дубай (2019), Кобе (2024) ҳамда Нью-Дели (2025) шаҳарлари бор.

Мусобақада 100 дан ортиқ мамлакатдан тахминан 1 300 нафар спортчи иштирок этиши кутилмоқда. Бу орқали ушбу Жаҳон чемпионати Марказий Осиё минтақаси тарихидаги энг йирик халқаро пара спорт тадбирига айланади. Мусобақа дастури Паралимпия ўйинлари дастурига мос ҳолда шакллантирилади.