Расман. UFC Лондонга қайтмоқда + ПОСТЕР

Бу ҳақда расман лига раҳбарлари хабар беришди. Унга кўра, 2023 йилнинг 18 март куни Лондондаги The O2 аренада UFC 286 турнири бўлиб ўтади. Катта эҳтимол билан оқшомнинг марказий жанги асли келиб чиқиши ямайкалик, ҳозирда Британия шарафини ҳимоя қилаётган Леон Эдвардс ҳамда нигериялик Камару Усман ўртасида ўтказилади. 

Ушбу трилогия жангига қизиқиш жуда юқори. Шу йилнинг 20 август куни Солт-Лейк-Ситида ўтган UFC 278 турнирида Леон Эдвардс дунёни шок ҳолатига тушириб қўйганди. Очколар ҳисобига кўра рақибига ютқазаётган Леон жанг якунланишига 56 сония қолганда оёқ билан кучли ва аниқ зарба йўллаб, Камару Усманни нокаутга учратган ҳамда UFC чемпионига айланган эди. Бу билан Эдвардс 7 йил аввалги мағлубият учун Усмандан реванш ҳам олганди. 

Маълумот учун, The O2 арена 2022 йил ҳисобида иккита UFC турнирини қабул қилди. Март ойида UFC Fight Night 204, июлда эса UFC Fight Night 208 турнирлари британиялик мухлислар томонидан катта қизиқиш билан қарши олинди. 

Британиядаги сўнгги рақамланган UFC турнири эса 2016 йилнинг октябрь ойида ўтказилган эди. Манчестер шаҳрида ўтган UFC 204 турнирида британиялик Майкл Биспинг ўрта вазндаги чемпионлик камарини Дэн Хендерсондан муваффақиятли ҳимоя қилганди. Лондоннинг ўзидаги сўнгги рақамланган UFC турнири эса 2010 йилнинг октябрига тўғри келади. Ўшанда ҳам Биспинг UFC 120 турнирининг марказий жангида япониялик Йошихиро Акиямадан устун келган эди.