Расмий стартига 10 кун қолган Осиё ўйинлари манзилида рекорд даражадаги ёғингарчилик сабаб миллионлаб одамлар эвакуация қилинмоқда

Нагоя шаҳрида рекорд даражадаги ёғингарчилик — соатига 104,5 мм қайд этилди. "Yomiuri" нашрининг хабар беришича, шаҳар ҳокимияти 2 миллион кишини эвакуация қилмоқда.

Шаҳарнинг гавжум маркази — Сакае туманида йўлларни сув босган, сув сатҳи тиззагача кўтарилган. Поездлар, автобуслар ва бошқа жамоат транспортлари қатнови айнан тиғиз вақтда тўхтатилди. Жумладан, JR, Meitetsu компаниялари, Нагоя шаҳар метроси ўз ишини тўхтатди. Нагоя вокзали яқинида ва бошқа жойларда уйига қайта олмаган одамлар учун вақтинчалик жойлаштириш пунктлари ташкил этилди.

Япония метеорология хизмати Шонай дарёси учун "бешинчи даражали сув тошқини бўйича махсус огоҳлантириш" эълон қилди. Чубу минтақавий ривожланиш бюроси маълумотларига кўра, префектура ҳукумати тасарруфидаги 15 та ер ости ўтиш йўлидан иккитасини сув босган. Ҳозирча жабрланганлар ҳақида маълумот келиб тушмаган.

Ёғингарчилик рекорди Нагоя метеорология обсерваторияси томонидан 8 сентябрь куни маҳаллий вақт билан соат 15:53 дан 16:53 гача бўлган вақт оралиғида қайд этилган. Аввалги рекорд (97 мм) Японияда 2000 йил 11 сентябрда Токай ҳудудида қайд этилган эди.

Маҳаллий метеорология обсерваторияси маълумотларига кўра, бугун, 9 сентябрь куни соат 18:00 га қадар 24 соат ичида айрим ҳудудларда ёғингарчилик миқдори 200 мм га етиши, 10 сентябрь куни соат 18:00 га қадар эса яна 80 мм ёғин ёғиши кутилмоқда. Агар чизиқли ёмғир минтақаси шаклланадиган бўлса, ёғингарчилик миқдори маҳаллий даражада янада ортиши хавфи мавжуд.