Расмий хабар: БААга қарши ўйиндан олдин Ўзбекистонда яна бир йўқотиш

"Ўзбекистон миллий терма жамоаси футболчиси Остон Ўрунов Бирлашган Араб Амирликлари терма жамоаси билан учрашувда жароҳат сабабли иштирок эта олмайди. Футболчимиз тез фурсатда соғайиб, сафга қайтишини тилаб қоламиз", - деб ёзади ЎФА матбуот хизмати. 

Эслатиб ўтамиз, Ўрунов 5 октябрь куни "Персеполис" сафида "Чадормалу"га қарши ўйиндан олдинги чигилёзди машғулотда жароҳат олган ва асосий таркибдан захирага олинган эди. Футболчи 10 октябрь куни Ўзбекистон терма жамоаси сафида Эронга қарши баҳснинг 71-дақиқасида Аббос Файзуллаевнинг ўрнига захирадан майдонга тушганди. У Эрон билан ўйиндан кейинги машғулотларнинг ҳеч бирида иштирок этмади.

Маълумот учун, Ўзбекистон терма жамоаси марказий ҳимоячиси Рустам Ашурматов Эрон билан учрашувда олган сариқ карточкаси туфайли БААга қарши баҳсни ўтказиб юборишга мажбур.