Равшан Рўзиқулов: Токиога тўлиқ таркибда боришга ҳаракат қиламиз

Ушбу йиғин эртадан Киев шаҳрида старт оладиган халқаро хотира турнирига тайёргарлик вазифасини ўтаб берди. Биз йиғин якунлари ва бўлажак турнирда иштирок этадиган курашчиларимизнинг имкониятлари ҳақида терма жамоа бош мураббийи Равшан Рўзиқуловдан интервью олдик.  

- Икки ҳафта давомида машҳур "Стайки" спорт мажмуасида машғулот ўтказдик, - дея сўз бошлади "классик" курашчиларимиз устози. - Фурсатдан фойдаланиб, ушбу йиғинни ташкил этиб берган Ўзбекистон Жисмоний тарбия ва спорт вазирлиги, Миллий олимпия қўмитаси, Ўзбекистон спорт курашлари ассоциацияси раҳбариятига раҳмат айтмоқчиман. Бу жуда ҳам муҳим йиғин эди. Унда Беларусь, Қозоғистон, Озарбайжон каби давлат терма жамоалари билан бирга кунига икки маҳалдан машғулот ўтказдик. Машғулотлар яхши шароитларда ҳамда кучли курашчилар билан кечди. Йиғин тугаши биланоқ халқаро турнирда қатнашишимиз ҳам айни муддао бўляпти. Курашчиларимиз машғулотда орттирган тажрибаларини бевосита амалда синаб кўришади. 

- Курашчиларимизнинг бугунги жисмоний тайёргарлиги сизни қониқтиряптими?

- Барибир бир йил давомида карантинда қолингани нафақат бизга, балки дунёнинг бошқа курашчиларига ҳам таъсир ўтказгани бор гап. Юқорида айтганимдек, аввалига ўзимизда, кейин Минскда ташкил этилган машғулотлар сиз айтган жисмоний ҳолатни маромига етказиб олиш учун хизмат қилди. Лицензион мусобақаларимизгача ҳали вақт бор. Ўйлайманки, унгача курашчиларимиз оптимал спорт формаларига кириб оладилар. Ҳозирда Элмурат Тасмурадов, Жалгасбай Бердимуратов ва Рустам Ассакалов Токио Олимпиадаси лицензиясига эга. Қолган курашчиларимиз Қозоғистон ва Болгарияда ўтказиладиган лицензион турнирларда ушбу имкониятни қўлга киритиш учун астойдил ҳаракат қилишади. Асосий мақсадимиз - Токиога тўлиқ таркибда йўл олиш. Бунинг учун йигитлар мусобақаларда борларини бериб иштирок этишади.