Разамбек Жамалов Будапешт турнири ғолибига айланди! Бекзод Абдураҳмонов эса...

Кун давомида -74 ҳамда -86 кг тоифаларида эркин курашчиларимиз гиламга кўтарилди.

-74 кг вазн тоифасида делегациямиз ҳисобига Олимпиада лицензиясини олиб берган Бекзод Абдураҳмонов мусобақани чорак финалдан бошлади. У илк жангида канадалик Адам Томсонни мағлубиятга учратди. Ярим финал беллашувида эса Абдураҳмонов мезбон юрт спортчиси Мурад Курамагомедовга имкониятни бой бериб қўйди. Шундан сўнг, Токио-2020 Олимпиадаси совриндори Бекзод Абдураҳмонов қирғизистонлик Орозбек Токтомамбетовга қарши бронза медали учун кечадиган беллашувда гиламга чиқмади ва ғалаба қирғизистонлик спортчига берилди.

Ушбу вазнда Ўзбекистон шарафини ҳимоя қиладиган яна бир спортчи - Разамбек Жамалов эса илк даврада венесуэлалик Крис Монтерони, чорак финалда грузиялик Георгий Элбакидзени мағлуб этди. Ярим финалда эса спортчимиз эронлик Али Аббос Резаигузгелега ҳеч қандай имконият қолдирмади. Жамалов финал беллашувида Бекзод Абдураҳмоновни ярим финалда қолдириб кетган Венгрия вакили Мурад Курамагомедовни 7:3 ҳисобида таслим этиб, мусобақа ғолибига айланди. Аввалроқ, айнан ушбу мусобақа орқали Париж Олимпиадасида -74 кг вазн тоифасида  терма жамоамиз шарафини ким ҳимоя қилиши ойдинлашиши мумкинлиги хабар қилинган эди.

-86 кг вазн тоифасида терма жамоамиз аъзоси Бобуржон Исломов ҳам ярим финалда мағлуб бўлди. Бронза медали учун кечган беллашувда у имкониятни бой бериб қўйди.