"Реал" ўзининг энг қиммат футболчиларидан бири билан хайрлашишга тайёр

Мадриднинг "Реал" клуби жорий ёзда жамоа сафини тарк этиши мумкин бўлган австриялик ҳимоячи Давид Алаба билан хайрлашиш ниятида. 

Манба маълумотига кўра, клуб бу қарор орқали маош фондини қисқартириш ва молиявий захираларни бўшатишни мақсад қилган. Аммо Алабанинг ўзи клубни тарк этиш ниятида эмас — у 2026 йил 30 июнгача мўлжалланган шартномасини охиригача бажариб, келаси ёзда бўлиб ўтадиган Жаҳон чемпионатига яхши спорт формасида етиб боришни хоҳламоқда.

Футболчининг келажагига доир якуний қарор унинг соғлиги ва тикланиш жараёнига боғлиқ бўлади. Маълумотларга кўра, июнь охирида олинган чап оёқ орқа мушакдаги жароҳат туфайли Алаба камида бир ой майдондан четда қолиши мумкин.

Айни вақтда Алаба Европадаги энг кўп маош олувчи ҳимоячилардан бири ҳисобланади — у ҳафтасига 415 минг евро (€1,88 млн ойлик, солиқлардан аввал йиллик €22,6 млн) маош олади. Мадрид клубида бу кўрсаткич бўйича ундан фақат Килиан Мбаппе ва Винисиус Жуниор юқорида туришади.

Эслатиб ўтамиз, 2023 йил декабридан 2025 йил январигача Алаба тиззасидаги кесишган боғлам жароҳати ортидан тикланиш билан машғул бўлди. 2024 йил февралда у ён мушагидан жароҳат олди, апрелда эса менискдаги шикаст туфайли яна майдондан четлашди. Ўтган мавсумда Алаба барча мусобақаларда атиги 14 та ўйинда қатнашди.