"Реал" ва Мбаппе вакиллари ўртасида зиддият: Килианнинг жароҳати кутилганидан жиддийроқ ва у "Ман Сити"га қарши ўйнашни истамаяпти

Томонлар тикланиш жараёни ва муддатлари борасида турлича фикрда.

"Реал"нинг режаси қандай эди?

Аввалроқ "Мадрид" франциялик ҳужумчининг тизза пайлари чўзилганини ва у тахминан 3 ҳафтани ўтказиб юборишини маълум қилган эди. "Cadena SER" нашрининг хабар беришича, клуб Мбаппенинг 17 март куни Чемпионлар Лигаси 1/8 финали доирасида "Манчестер Сити"га қарши кечадиган ўта муҳим жавоб ўйинида майдонга туша олишига тўла ишонмоқда.

Мбаппе атрофидагилар нима демоқда?

Бироқ футболчининг вакиллари бу баҳога умуман қўшилмаяпти. Уларнинг таъкидлашича, Килианнинг жароҳати кўринганидан кўра анча жиддий ва ЖЧ-2026 мусобақаси бошланишига атиги 100 кун қолган бир пайтда таваккал қилиш ярамайди. Франция терма жамоаси сардори мундиалгача тўлиқ соғайиб олишни мақсад қилган.

Журналист Антон Меана Мбаппе вакилларининг позициясини қуйидагича келтириб ўтди:

"Ўйинчининг чап тиззасидаги орқа хочсимон пайлари узилиш арафасида турибди. Тиббий хулосада ёзилгани учун буни шунчаки "пай чўзилиши" деб атай қолайлик, аммо жароҳат ҳақиқатан ҳам ўта жиддий. Жаҳон чемпионатига тўлиқ тикланиб бориши учун унга мана шу 100 кун сув ва ҳаводек зарур".

Шу сабабли, Мбаппенинг вакиллари "Реал" томонидан белгиланган тезлаштирилган тикланиш графигига норозилик билдирмоқда. "Манчестер Сити"га қарши майдонга тушиш катта риск ва Мбаппе бундай таваккалга қўл урмоқчи эмас", — деб қўшимча қилди Меана.