"Реал" ва яна бир қатор жамоалар клублар ўртасидаги ЖЧ ҳар 2 йилда ўтказилишини хоҳлашмоқда, ФИФА эса...

ESPN хабарига кўра, турнирни тез-тез ўтказишни Европа ва Жанубий Американинг даромадларини оширишга қизиққан бир қатор клублар қўллаб-қувватламоқда. Ислоҳот бўйича расмий сўров ҳозирча келиб тушмаган, аммо бир неча топ-клублар раҳбарлари ФИФА вакиллари билан бундай имкониятни муҳокама қилган.

Хабарларга кўра, ФИФА клублар ўртасидаги жаҳон чемпионати натижаларидан мамнун, лекин ҳозирда турнирни тез-тез ўтказишни "амалга ошириб бўлмайди" деб ҳисоблайди. Якунланган мусобақа натижаларига кўра, иштирокчи клублар ўртасида 1 миллиард доллар тақсимланди ва ФИФА бу миқдордаги суммани ҳар икки йилда йиғиш имконсиз деб ҳисоблайди.

Бундан ташқари, ФИФА клублар жаҳон чемпионатини икки йилда бир марта ўтказиш УЕФА билан низога олиб келиши мумкин деб ҳисоблайди, бу эса ташкилот манфаатларига зиддир. Жаҳон футболини бошқарувчи орган мавжуд футбол тақвимининг мураккаблигини ҳам қайд этмоқда.

Ҳозирда ФИФА кейинги клублар ЖЧ 2029 йилда ўтишига тайёргарлик кўрмоқда. Турнирни ўтказиш учун потенциал даъвогарлардан бири сифатида Қатар кўриб чиқилмоқда.