Регби жамоамиз жанубий африкалик мураббий билан Париж Олимпиадасига тайёрланмоқчи эмиш

Бугун Ўзбекистон регби федерациясининг мазкур мусобақалар учун тайёрлаган режаси кўриб чиқилди. Онлайн йиғилишни МОҚ раиси Рустам Шоабдураҳмонов олиб борди. Унда, шунингдек, Ўзбекистон регби федерацияси бош котиби Қаҳрамон Жалилов, Спорт ўйинлари бўйича Республика олий спорт маҳорат мактаби директор Жасур Акрамов, жамоа мураббийлари ва Қўмита ходимлари қатнашишди. 

Тақдимотни Қаҳрамон Жалилов олиб борди ва федерациянинг яқин йилларга тузилган режалари билан таништирди. Унга мувофиқ, регби спортида етакчи мамлакатлардан саналган Жанубий Африка Республикасидан ташриф буюрган мутахассис Андре Хуман жамоамизни мусобақаларга тайёрлайди. Йиғилишда МОҚ раиси шу ва бошқа режалар борасидаги фикрларини билдириб ўтди.

“Ҳукуматимизнинг қўллаб-қувватлаши билан регби жадал суратларда ўсишда давом этмоқда. Бу кетишда регби ҳам яқин йиллар ичида ўзбек спортида юқори ўринлардан бирига кўтарилиб олади. Бунинг учун, албатта, бироз вақт керак. Бундай тажрибали хорижлик мураббий ва Сизлардек ўз ишининг жонкуярлари билан жамоамизни етакчилар қаторига олиб чиқа оламиз”, – деди Рустам Шоабдураҳмонов.

Қайд этиш жоиз, Рио-2016 Олимпия ўйинларидан мусобақа дастурига регби-7 йўналиши киритилган. Ўзбекистон регби федерациясининг режасига кўра, жамоамиз Париж-2024 Олимпия ўйинларига лицензия олишни мўлжалламоқда. Учрашувда, Республикада ушбу спортни янада оммалаштириш, ёшлар жамоасини шакллантириш учун селекция сиёсатини йўлга қўйиш, терма жамоа учун халқаро ўқув-машғулот йиғинлари ва мусобақаларни ташкил қилиш каби йўналишларда тавсиялар берилди.