17 авг 12:14
Янгиликлар

Дзюдо

Рио Олимпиадаси совриндори Диёрбек Ўразбоевни табриклаймиз!

Бугун Рио Олимпиадасининг бронза медали соҳиби, Осиё ўйинлари ғолиби, жаҳон ва Осиё чемпионати совриндори, Ўзбекистон Республикасида хизмат кўрсатган спортчи, Халқаро тоифадаги спорт устаси Диёрбек Ўразбоев таваллуд топган кун.

Диёрбек Ўрозбоев 1993 йил 17 август куни Хоразм вилоятининг Шовот туманида туғилган. Мураббийлари Жамшид Худойберганов ва Вячеслав Перетейкодан илк дзюдо сабоқларини олган.

Табрик аввалида Диёрбекнинг халқаро мусобақаларда қўлга киритган ютуқлари ҳақида маълумот бердик. Айни кез қисқа сатрларда Ўразбоевнинг Рио-2016 Олимпия ўйинларидаги иштирокига тўхталиб ўтамиз. Иштирокини 1/32 финалдан бошлаган ҳамюртимиз бу босқичда австралиялик Жошуа Катцни мағлубиятга учратди. Иккинчи учрашувида швейцариялик Людовик Шаммартендан устун келди. Чорак финалда эса қозоғистонлик Елдос Сметовга ютқазиб қўйди. Бронза медали учун курашда аввалига бразилиялик Фелипе Китадаини, кейин эса грузиялик Амиран Папинашвилини таслим этди ва Олимпиада совриндорига айланди.

Фурсатдан фойдаланиб, Ўзбекистон дзюдо федерацияси раҳбарияти, мураббийлар штаби, спортчилар Диёрбек Ўразбоевни бугунги унутилмас кун муносабати билан чин қалбдан муборакбод этади.