"Ролан Гаррос-2026". Камилла Раҳимова дунёнинг 10-ракеткасига қарши кортга чиқди

Мукофот жамғармаси 30 млн 861 минг 500 еврони ташкил этувчи мазкур мусобақада Ўзбекистон терма жамоаси аъзоси, мамлакатимизнинг биринчи рақамли ракеткаси Камилла Раҳимова иштирок этаётгани ҳақида хабар бергандик.

24 яшар ҳамюртимиз илк даврада дунё рейтингида 32-ўринни эгаллаб турган руминиялик Кристиан Жаклинни 2:1 (6/3, 4/6, 6/4) ҳисобида мағлубиятга учратган эди.

Камилла бугун иккинчи даврадаги ўйинини ўтказди. 29 ёшли чехиялик Каролина Муховага қарши кечган баҳсда вакиламиз 0:2 (2/6, 2/6) ҳисобида имкониятни бой берди. Ўйин 1 соат, 21 дақиқа давом этди. 

Бу икки теннисчининг ўзаро ўтказган иккинчи ўйини эди. 2023 йил май ойида бўлиб ўтган илк қарама-қаршиликда ҳам Каролинанинг қўли баланд келганди.

Маълумот учун, ўйин олдидан Камилла Раҳимова дунё рейтингида 89, Каролина Мухова эса 10-ўринни эгаллаб турган эди.

Ҳамюртимизнинг "Ролан Гаррос" турниридаги энг яхши натижаси 2023 йилга тўғри келади. Ўшанда у учинчи босқичгача етиб бориб, Арина Соболенкога мағлуб бўлганди. Камилла энди ўз юришини жуфтлик баҳсларида давом эттиради.