Роман Долидзега янги рақиб, рақамли ўрнига рақамсиз турнир берилди

Энтони Эрнандес жароҳат олганидан кейин грузиялик аралаш яккакураш устаси рақибсиз қолганди. Матчмейкерлар аслида UFC 302 турнирида октагонга чиқиши керак бўлган Романнинг жангини рақамсиз UFC on ESPN 57 турнирига кўчиришди. Энди Долидзе дивизионнинг 13-поғонасидан жой олган бразилиялик Мишель Перейрага қарши баҳс олиб боради. 

Маълумот учун, 35 ёшли Роман Долидзе кетма-кет иккита жангда мағлубиятга учраган. У Марвин Веттори ва Нассурдин Имавовга очколар ҳисобига кўра имкониятни бой бериб қўйганди. 30 яшар Мишель Перейра эса бир ҳафта аввал UFC октагонидаги қаторасига саккизинчи ғалабасини тантана қилган эди. Ўшанда у жангнинг 54-сониясидаёқ украиналик Игорь Потеряни бўғиб қўйганди.

UFC on ESPN 57 турнири 8 июнь куни Луисивилл шаҳрида бўлиб ўтади. Оқшомнинг марказий жанги ўрта вазн тоифасида Жаред Каннонир ҳамда Нассурдин Имавов ўртасида ўтказилади.