Россия аёллар кураши терма жамоасига бош мураббий тайинланди

Йиғилишда икки муҳим масала - катталар ўртасидаги мамлакат чемпионатини ўтказиш ҳамда Россия аёллар кураши терма жамоасига бош мураббийни тайинлаш кўриб чиқилди. Аслида аёллар кураши бўйича Россия чемпионати май ойида айнан Татаристон пойтахти Қозон шаҳрида ўтказилиши лозим эди. Лекин коронавирус пандемияси сабаб мусобақа кечроқ муддатга қолдирилганди. 

Федерация қарорига кўра, 26-27 сентябрь кунлари аёл курашчилар "Ак Барс" спорт аренасида 10 та вазн тоифасида медаллар жамланмаси учун баҳсларга киришишади. Ўз вазнларида чемпион бўлган курашчилар декабрь ойида Сербиянинг Белград шаҳрида ўтказиладиган Жаҳон чемпионатида Россия терма жамоаси шарафини ҳимоя қилиш ҳуқуқига эга бўлишади.   

Россия аёллар кураши терма жамоасининг янги бош мураббийи сифатида Симеон Штерев таништирилди. Болгариялик мутахассис терма жамоанинг марҳум собиқ бош мураббийи Магомед Алиомаровнинг ёрдамчиси сифатида ишлаб келаётганди. Алиомаров май ойида коронавирус инфекциясидан вафот этганди. Яқинда эса Симеон Штеревнинг ўғли, Болгария терма жамоаси аъзоси Никола Штерев ҳам айнан коронавирус сабаб бу ёруғ оламни тарк этди.