Россия ЖЧ-2020 мезбонлигига даъвогарлик қилмайди

Бу ҳақида Россия спорт курашлари федерацияси президенти Михаил Мамиашвили хабар берди.

"Биз режа асосида ишлаяпмиз, - деди Мамиашвили. - Маълумки, 2022 йилги катталар ўртасидаги Жаҳон чемпионати Красноярскда бўлиб ўтади. 2021 йил эса Уфа ўсмирлар ўртасидаги жаҳон чемпионатига мезбонлик қилади. Куни кеча Бирлашган кураш дунёси (UWW) 2020 йилги мавсумнинг қолган қисми учун тақвим лойиҳасини тақдим этди. Унга кўра мавсум рестарти сентябрь ойига мўлжалланмоқда. Катталар ўртасидаги жаҳон чемпионатини йил сўнггида ўтказиш режалаштириляпти. Бунга АҚШ ва Эрон вакиллари қарши бўлишди. 

Ўзи аслида бу йилги тақвимда жаҳон чемпионати йўқ эди. Токио Олимпиадасининг бир йилга кечиктирилиши сабаб жаҳон чемпионатини ўтказиш масаласи кун тартибига чиқди. UWW мусобақани қабул қилиш истагида бўлган давлатлардан аризалар тақдим этилишини кутяпти. Биринчи бўлиб бу таклифни Беларусь тақдим этди. Ўтган йили бу мамлакатда Европа ўйинларининг ўтказилганини инобатга олсак, у ерда жахон чемпионатини юқори савияда ташкил этса бўлади. Минскда ҳамма нарса тайёр. Лекин кейинроқ ташкилотчи томон катта сарф-ҳаражатлар қилиши маълум бўлгач, Беларусь томони ўз аризасини қайтариб олди. 

Август ойида UWW бу масалага яна қайтади ва 2020 йилнинг декабрь ойида жаҳон чемпионатини ўтказиш масаласини муҳокамага қўяди. Албатта, бунда коронавирус сабаб дунёда юзага келган эпидемиологик вазият ҳам инобатга олинади".