Россиялик чемпион қайтмоқда. Махачев камарни Нурмагомедов «қурбони»дан ҳимоя қилади

2024 йил бошидан, Рамазондан аввал жанг ўтказишни сўраган Ислам Махачев ниҳоят Дастин Порье билан тўқнаш келадиган бўлди. Тўғрисини айтганда, Порье Бенуа Сен-Денини нокаутга учратиб, мағлуб этгач, чемпионлик камари учун баҳс олиб бориши ҳақида миш-мишлар тарқала бошлаганди. Бундан ташқари, америкалик жангчи тўқнашув эълон қилинишидан бир ҳафта олдин чемпионлик жангига ҳозирлик кўраётганини маълум қилганди. “Кейинги нишон Ислам Махачев. Юқорига чиқиш вақти келди”, деганди Дастин.

Номзоднинг танлови аниқ эмас. Ҳа, Порье катта ном ва Махачевнинг машҳурлигини кўтара оладиган даражадаги юлдуз. У унвонга лойиқми? Сўнгги жангида америкалик дивизионнинг 12-рақамли жангчиси билан беллашгани унинг имкониятларини тўлақонли баҳолаш учун етарли эмас. Бироқ, Дастин фойдасига ишловчи муҳим омил мавжуд. У март ойининг бошида жанг қилди ва кейин июнь ойида чемпионлик жангини қабул қилишга тайёр эканлигини ошкор қилди. “Олмос” Сен-Денис билан дуелдан кейин жиддий жароҳатларсиз чиқиб кетишга муваффақ бўлди. Шу билан бирга, Чарльз Оливейра, Арман Царукян ва Жастин Гетжи тимсолидаги бошқа даъвогарлар UFC 300 турнирида иштирок этиб бўлишди ва ёз бошида бўлиб ўтувчи UFC 302'га қадар тикланиши қийин масала ҳисобланади. Шу туфайли Дастин ушбу мақомга мушарраф бўлди. 

Россияликнинг мураббийи Хавер Мендез ҳам Махачев қолган рақибларни кутишидан кўра, Порье билан курашиш энг мақбул вариант эканлигини таъкидлади. “Ислам ўзини ҳимоя қилишга тайёр бўлган пайтда жанг қилишни истайдиган ҳақиқий профессионал. У фақатгина Рамазон ойи ва ундан қисқа вақтдан кейин жанг қилмайди, холос. Агар Дастин кейинги рақиб бўлса, бу ажойиб, мабодо Гетжи бўлиб қолганида ҳам бу ёмон бўлмасди. Гетжи ва Оливейранинг жанг натижалари қандай бўлишини билмаймиз. Эҳтимол, кимдир жароҳат олар. Шунда Махачев қачонгача кутиши керак. Демак, мен Порье вариантини ёқлайман. Унинг ҳеч қандай жароҳати йўқ, у ўз услубига эга жангчилардан саналади”, деганди Мендез юбилей турнирдан аввал. Қолаверса, бу россиялик учун жуда қулай вақт оралиғидир. Агар июнь ойида баҳс бўлиб ўтса, у йил охиригача тикланиши ва яна мусобақаларда қатнашиши учун етарлича вақт бўлади.

35 ёшли америкалик учун, бу катта эҳтимол билан чемпионликни қўлга киритиш учун сўнгги имконият. «Олмос» вақтинчалик унвонни олган ва муносиб равишда UFC шон-шуҳрат залининг юлдузи ва бўлажак аъзоси ҳисобланади, аммо Луизина штатида туғилган спортчи ҳали асосий совринни қўлга кирита олганича йўқ. Уни илк бор Хабиб Нурмагомедов мағлуб этганди. Ўша жангнии кўпчилик яхши эсласа керак. Кейинроқ Дастин Оливейрага ютқазиб қўйди. Ҳар икки енгил ҳам бўғиш услуби орқали содир бўлди. Махачев ҳамда Дастин аста-секин жангга қизиқишни кучайтира бошлади. Улар ижтимоий тармоқлар ва оммавий ахборот воситалари орқали «даҳанаки жанглар»ни тўхтатишгани йўқ. Ислам Дастин чемпионлик жангига лойиқ эмаслигини таъкидлади: «Ҳа, Порье камар учун курашиишга нолойиқ, лекин бизда бошқа имконият йўқ, ҳамма банд. Мен бўлса октагонга киришни истайман. Дастинга қарши баҳсдан сўнг йил охирига қадар яна битта жанг бўлади. У охирги тўқнашувида ажойиб нокаут эвазига ғолиб бўлди. У соғлом ва тайёр, шунинг учун мен америкаликка қарши баҳс олиб бормоқчиман. Дастин яхши рақиб».

Ҳабиб Жўрабоев таржимаси