Россиялик шахматчилар Осиё чемпионатида 17 та медаль қўлга киритишди

Кеча блиц йўналишида ғолиб ва совриндорлар номи маълум бўлди. Қизиғи шундаки, Европа қитъаси вакили ҳисобланган Россия терма жамоаси ҳам Осиё чемпионатида муваффақиятли иштирок этмоқда. 

Олти ёш тоифасида ўтган мусобақада жами 561 шахматчи қатнашган бўлса, улардан 51 нафарини россияликлар ташкил этиб берди. Роман Шогджиев ва Валерия Клейменова (16 ёш) Осиё чемпиони бўлишди. 8 ёшлилар баҳсида қатнашган Шогджиев 9 имкониятдан 9 очко жамғарди. 

Иван Кудрин, Оксана Смирнова (10 ёш), Таймаз Темирбеков (12 ёш), Марат Гилфанов (14 ёш) кумуш, Кристина Завиваева (10 ёш) ва Алексей Прохоров бронза медалига сазовор бўлди. 

Россия терма жамоаси блиц ва рапид йўналишларида жами 17 та (3 таси олтин) медаль қўлга киритди. Ҳозирча медаллар сони бўйича айнан Россия умумжамоа ҳисобида биринчи ўринни эгаллаб турибди. Вьетнамда 13, Ҳиндистонда - 12, Қозоғистонда - 5, Хитой ва Ўзбекистонда 4 тадан медаль бор. Барча ғолиб ва совриндорлар 21 декабрь куни маълум бўлади.