Руис Жошуа билан реваншга вазн ташлайдими?

Руиснинг сўзларига қараганда, Жошуага қарши кечган илк жангда унинг вазни 121 килограмм бўлган. Руис реванш жангида 113-115 килограмм вазнга эга бўлмоқчи. 

"Реванш жангида ҳам ғалаба қозонишим учун яна ҳам кучлироқ ва тезкорроқ бўлишим керак. Лекин бунинг учун сезиларли даражада вазн ташламоқчи эмасман. Семиз ҳолатимда ҳам тарихий натижага эришдим. Энди бироз ўзимга қараб олишим талаб этилади. Энг муҳими, концентрацияни йўқотмаслик", - деди Руис USA Today нашрига берган интервьюсида.  

Маълумки, Руис ширинликларни, хусусан шоколадни жуда ҳам севиб истеъмол қилади. Жошуага қарши жангдан сўнг уни "Сникерс" рекламасига таклиф ҳам қилишди. Ўша жангдан кейин у бир дона ҳам шоколад батончигини истеъмол қилгани йўқ. Шунинг ўзиёқ унинг вазнига эътибор қарата бошлаганидан дарак беради.