12 июн 17:13
Янгиликлар

Бокс/ММА

Руслан Чагаевни ким ёки нима рингга қайтариши мумкин?

Профессионал бокснинг супероғир вазн тоифасида WBA йўналишида собиқ жаҳон чемпиони Руслан Чагаев яқинда сайтимиз меҳмони бўлган эди.

Икки соатга яқин давом этган қизиқарли суҳбат чоғида ҳамюртимиз кўплаб мавзулар бўйича берилган саволларга атрофлича жавоб қайтарганди. Саволлардан бири Чагаевни ким ёки нима яна рингга қайтариши мумкинлиги ҳақида бўлган эди. Руслан эса узоқ ўйланганидан сўнг шундай жавоб берганди.

“Менимча, ҳеч нарса! Лекин яна бир гап бор - ҳеч қачон йўқ дема! Шу маънода, ҳа, юз фоиз фаолиятимни якунладим, деб ҳам айта олмайман. Аммо, қайтмаслигим 99 фоизга аниқ.

Ким ёки нима фикримдан қайтариши мумкин? Буни фақат Яратган билади. Қозоннинг қопқоғини зичлаб беркитганим йўқ. Лекин бугунги кунимдан келиб чиқиб гапирадиган бўлсам, ҳаётдан шунчаки завқ оляпман. Оилам, фарзандларим даврасидаман. Менга ҳозир шу кўпроқ маъқул келяпти”, деди Чагаев.