Рустам Қосимжонов пешқадамлар сафига қайтди

Кеча куннинг иккинчи ярмида мусобақанинг саккизинчи тур учрашувлари ўтказилди. Турнирда биринчи рақам остида сараланган Рустам Қосимжонов ушбу турда оқ доналарда ҳаракат қилди. 17-жаҳон чемпиони яна бир ҳамюртимиз Никита Хорошевни мағлубиятга учратди. 

15 ёшли халқаро гроссмейтеримиз Нодирбек Абдусатторов эса пешқадам, қозоғистонлик гроссмейстер Ринат Жумабоев билан дуранг ўйнади. Тажрибали гроссмейстеримиз Марат Жумаев қозоғистонлик Муртаз Кажгалеевга имкониятни бой бериб қўйди.  

Саккизинчи турдан сўнг мусобақа жадвалида қўшҳокимлик юзага келди. Ринат Жумабоев ва Рустам Қосимжонов 6 очкодан жамғаришган. Қўшимча кўрсаткичларга кўра Жумабоев биринчи ўринни эгаллаб турибди. Нодирбек Абдусатторов ва Муртаз Кажгалеев 5,5 очко билан кучли тўртликдан жой олган. 

Бугун сўнгги 9-турда Рустам Қосимжонов оқ доналарда Кажгалеевга, Ринат Жумабоев ватандоши Пётр Костенкога қарши баҳс олиб боради. Абдусатторов эса қора доналарда Шамсиддин Воҳидовга қарши ҳаракат қилади.