Рустам Шоабдураҳмонов: “Давлат ажратаётган пулларни мақсадли сарфлашимиз лозим”

Мазкур учрашувни МОҚ президенти Рустам Шоабдураҳмонов олиб борди. Таъкидлаш жоиз, мазкур йиғилиш танқидий руҳда ўтиб, баъзи федерацияларнинг моддий-техник базаси ва спортчиларнинг шуғулланидиган жойлари талаб даражасида эмаслиги ҳақида кескин фикрлар ҳам билдириб ўтилди.

“Давлатимиз Токио Олимпиадасига олиб борилаётган тайёргарликни қўллаб-қувватламоқда ва бу борада катта маблағ ажратмоқда. МОҚдан тортиб, ҳар бир федерацияга масъул ташкилотлар бириктириб берилган. Лекин ҳамма федерацияда ҳам спортчилар учун яхши шароит яратиб берилмаган, ҳамма ҳам спортчиларнинг оиласидан, ижтимоий аҳволидан хабар олмаяпти. Ўқув-йиғин машғулотларини молиялаштиришда муаммо бўлмаяпти дегани исталган жойга бориб, хоҳлаганча айланиб келишни англатмайди. Давлат ажратаётган пулларни мақсадли сарфлашимиз лозим”, – деди Рустам Шоабдураҳмонов.

Учрашув давомида келаси йил Олимпиадагача бўлган давр мобайнида федерацияларни молиялаштириш учун кетадиган сарф-ҳаражатлар сметасини қайта кўриб чиқиш ва уни мукаммаллаштириш бўйича муҳокама олиб борилди. Шунингдек, МОҚ раҳбари федерацияларга бириктирилган мутасаддиларга спортчиларнинг машғулотларини, шароитларини янада чуқурроқ ўрганиш бўйича қўшимча топшириқлар берди.