Сабина Шарипова финалда!

Мусобақада иккинчи рақам остида ҳаракат қилаётган теннисчимиз Сабина Шарипова турнирдаги дастлабки ўйинларда ҳиндистонлик Прерна Бхамбри ва россиялик Анна Моргиналарни мағлуб этиб, чорак финалга етиб келганди. Чорак финалда эса у россиялик бошқа бир теннисчи Натела Жалимидзега қарши кортга чиқиб, 6:2, 6:3 ҳисобида ғалаба қозониб ярим финалга йўл олганди. 

Ҳозиргина якунига етган ярим финал баҳсида Сабина турнирнинг учинчи ракеткаси россиялик Ксения Ликинадан устун келди. Аниқроғи, биринчи сетни 2:6 ҳисобида бой берган Ликина иккинчи сетнинг тўртинчи геймидан сўнг курашни давом эттира олмаслигини маълум қилди. Бу вақтга келиб Шарипова 3:1 ҳисобида олдинда бораётганди. 

Ҳамюртимизнинг бош мукофот учун учрашувдаги рақибаси яна бир рус теннисчиси Полина Монова бўлади. Саралаш баҳслари орқали асосий тўрга етиб келган Полина ярим финалда қозоғистонлик Гўзал Айнитдиновани 6:3, 6:4 ҳисобида таслим этди.