Саид Нурмагомедовнинг UFC 308 турниридаги жанги бекор қилинди, Саидёқуб Қаҳрамонов бунга муносабат билдирди

У 26 октябрь куни Абу-Даби шаҳрида ташкил этиладиган турнир доирасида бразилиялик Даниэль Сантосга қарши жанг қилиши лозим эди. Бироқ Сантос машғулотда жароҳат олди. UFC эса кичик муддатда Саид Нурмагомедов учун захира вариантини топа олмади.

Аввалроқ, ўзбекистонлик собиқ UFC жангчиси, Саид Нурмагомедов билан 2022 йилда жанг қилиб, мағлуб бўлган Саидёқуб Қаҳрамонов UFC'дан реванш сўраган эди. Лекин унга бу имконият тақдим этилмади.

Ҳамюртимиз бунга қуйидагича изоҳ берди:

"Саид Нурмугамедовнинг жанги бекор қилинганидан жуда хафаман. Умид қиламанки, улар унга тез орада жанг ташкил қилиб беришади. Кўп йигитлар фақатгина шу кард орқали UFC'га кириб олиш учун бу жангни ўтказишга ҳаракат қилганини кўрдим. Уларнинг аксарияти мен каби ғалаба қозониш ҳақида қайғурмади", деб ёзди Қаҳрамонов ўзининг Твиттер саҳифасида.