Саида Маҳмудова стол тенниси федерацияси мутасаддилари ва мураббийлари билан онлайн конференция ўтказди

Жумладан, мамлакатимиз стол тенниси федерацияси раиси Саида Маҳмудова бугун федерация мутасаддилари ва ходимлари ҳамда вилоят мураббийлари билан видеоконференция орқали боғланди. Унда карантин қоидаларига қаттиқ риоя қилиш, карантин вақтида масофавий машғулотлар олиб бориш ва мураббий ҳамда спортчиларни соғлиқларини назорат қилиш каби масалалар кўрилди.

С.Маҳмудова суҳбат давомида ходимларнинг саломатлиги ва карантин вақтида кунни қандай ўтказаётганлиги, муаммо ва камчиликлар ҳақида сўради. Шунингдек, ҳар қандай ҳолатда ҳам ишни самарали олиб бориш ва карантин қоидаларини бузмаслик, спортчилар устидан доими назоратни таъминлаш бўйича кўрсатмалар берди. Стол теннис бўйича терма жамоа мураббийлари ва шифокорларига спортчиларнинг уй шароитида олиб борилаётган машғулотларини кузатиб бориш ҳамда уларнинг саломатлиги ҳақида ҳисобот беришларини сўради.

Видеоконференцияда Тошкент шаҳар ва вилоят мураббийларининг олиб бораётган фаолиятлар ҳақида ҳисоботлар тингланди. Суҳбат якунида Саида Маҳмудова томонидан мамлакатимиз стол тенниси федерацияси барча аъзолари ўртасида мазкур спорт тури бўйича «Энг яхши видеоролик» челленжни ўтказиш таклифи берилди ва бу бир овоздан маъқулланди.

Ўзбекистон стол тенниси федерацияси матбуот хизмати