Саиджамшид Жафаров Ўзбекистон чемпионатидан сўнг Дубайдаги "IBA Champions Night" оқшомида жанг қилади, рақиб - Жаҳон чемпиони

Мусобақанинг марказий жангида россиялик Олимпиада чемпиони Альберт Батиргазиев уч карра Жаҳон чемпиони, Куба вакили Лазаро Альварес билан тўқнаш келади. 10 раундлик жанг енгил вазн тоифасидаги чемпионлик камари учун ўтказилади.

Эътиборлиси, ушбу мусобақа доирасида ўрта вазн тоифасида ўзбекистонлик боксчи Саиджамшид Жафаров ҳам рингга кўтарилади. Ҳамюртимизга ўша куни япониялик Жаҳон чемпиони ҳамда Ханчжоу-2022 Осиё ўйинлари ғолиби Севон Оказава рақиблик қилади.

Қизиғи, Саиджамшид БААда ташкил этилган ўтган йилги "Чемпионлар оқшоми"да ҳам жанг қилган эди. Жафаров билан биргаликда ўша мусобақада яна бир боксчимиз Баҳодир Жалолов ҳам рингга чиқиб, ғалаба қозонган эди.

Маълумот ўрнида, Саиджамшид Жафаров шу кунларда Тошкентда давом этаётган Ўзбекистон чемпионатида иштирок этмоқда. У кеча илк жангини Мангуберди Абдурасуловга қарши ўтказиб, ҳакамларнинг якдил қарори билан ғалаба қозонган эди.