Саидёқуб Қаҳрамонов Умар Нурмагомедовга: "Мен билан жанг қил!"

Энг енгил вазнда ўзбекистонлик UFC жангчиси Саидёқуб Қаҳрамонов (10-3) россиялик Умар Нурмагомедовга (16-0) мурожаат қилди.

Аввалроқ, Умар Нурмагомедов ўз вазнида умуман рақиб топа олмаётганини ёзиб қолдирган эди.

"Менинг дивизионимдан кимдир деганингда, мен билан жанг қилишингни сўрайман. Сен аслида буни назарда тутмаган эдинг-а? Мен бу чорловни ҳақиқий деб ўйлагандим", - деб ёзиб қолдирган ҳамюртимиз.

Қаҳрамонов сўнгги бор 2022 йилнинг 18 декабрь куни Лас-Вегас шаҳри (АҚШ)да ташкил этилган UFC Fight Night мусобақаси доирасида россиялик Саид Нурмагомедовга (17-2) қарши октагонга кўтарилиб, сабмишен эвазига мағлуб бўлган эди.

Умар Нурмагомедов эса охирги жангини 14 январь куни Лас-Вегас (АҚШ)да ўтказилган UFC Fight Night турнирида бразилиялик Раони Барсельосга (17-4) қарши ўтказиб, техник нокаут билан ғалаба қозонганди.

Икки жангчи 2018 йилда PFL лигасида ўзаро тўқнаш келишган. Ўша жангда Умар Нурмагомедов ҳакамлар қарори билан ҳамюртимизни мағлуб этган эди.