Сакен Полатов жаҳон чемпионати олдидан ўз фикрлари билан ўртоқлашди

Жаҳоннинг етакчи жамоаларидан бири Куба билан ўтган қўшма йиғин боксчиларимиз учун ҳар томонлама фойдали бўлди. Бу Ўзбекистон ва Куба бокс федерациялари ўртасида йўлга қўйилган илиқ муносабатларнинг амалий ифодаси дейиш мумкин. 2019 йил якунида жамоамиз Гаванада қўшма йиғинда иштирок этган эди. Бунга жавобан жаҳон чемпионатидан аввал кубаликлар “ўзбек йўлбарслари” билан юртимизда йиғин ўтказишни маъқул кўришди.

Сербиядаги жаҳон чемпионатига танланган таркиб жамоамиз учун ҳозирги кундаги оптимал вариант бўлди, десак муболаға бўлмайди. Федерация раҳбарияти ва мураббийлар штаби бу борада истиқболли режа билан ҳаракат қилмоқда. Қуйида МОҚ раиси ўринбосари, Ўзбекистон бокс федерацияси раисининг биринчи ўринбосари Сакен Полатов билан ўзбек боксининг яқин келажакдаги режалари ҳақидаги суҳбатни эътиборингизга ҳавола этамиз:

– Сербияда ўтадиган жаҳон чемпионати биз учун қанчалик муҳим? Унда асосий эътибор нимага қаратилади?
– Бу галги жаҳон чемпионатида асосий эътиборни тажриба ва ёшлик шижоатини уйғунлаштиришга қаратдик. Ҳасанбой Дўсматов, Шаҳрам Ғиёсов, Шаҳобиддин Зоиров, Миразизбек Мирзаҳалилов каби дунё тан олган тажрибали боксчиларимиз олдида Абдумалик Халаков, Мужибилло Турсунов, Асадхўжа Мўйдинхўжаев, Саиджамшид Жаъфаров, Шоҳжаҳон Абдуллаев, Лазизбек Муллажонов каби ёшларимиз улардан катта маҳорат олиб, жаҳон ареналари учун муносиб тобланишлари мумкин. Бундан мақсад 2023 йил Тошкентда илк маротаба ўтказиладиган эркаклар ўртасидаги жаҳон чемпионатига терма жамоамизни тайёрлаш ва Париж-2024 Олимпиадасига таркибни ҳозирдан шакллантириб боришдир.

– Сўнгги тайёргарлик учун Куба жамоасини танлаш ғояси қаердан келиб чиқди?
– Куба жамоасининг йиғинга танланиши ҳам бежиз эмас. Президентимиз 13 август куни Олимпиячиларимиз билан ўтган учрашувда хориж тажрибасини, шу жумладан четдаги кучли мактаблар методикаси ва услубини ўрганиш, улар билан ҳамкорликни йўлга қўйиш бўйича тавсиялар берган эдилар. Ана шу мақсадда биз жаҳон боксида ўз ўрнига эга бўлган, жумладан, Токио-2020 Олимпия ўйинларини умумжамоа ҳисобида биринчи ўринда якунлаган Куба терма жамоасини таклиф этдик. Бу жамоа билан ўзаро мустаҳкам ҳамкорлик алоқалари йўлга қўйилган. Аввал биз Кубада йиғин ўтказган бўлсак, бу гал улар Тошкентга ташриф буюришди. 9 кун давомида жаҳоннинг энг кучли боксчилари, эътибор беринг, улар орасида 4 таси Олимпиада чемпиони боксчиларимиз билан тажриба алмашишди. Ўз навбатида, улар ҳам ўзбек боксидан баъзи жиҳатларни ўргандилар. Ўйлайманки, бу ҳамкорлик иккала томон учун ҳам фойдали бўлди.

– Яқин йиллар учун федерация ўз олдига қандай режалар қўйган? Халқаро майдонда мамлакатимиз имиджини ошириш бўйича қандай дастурлар бор?
– Олдимизда жиддий стратегик режалар бор. Келаси йил январь ойида Тошкент 22 ёшгача бўлган боксчилар ўртасидаги Осиё чемпионатига мезбонлик қилади. Барча қилинаётган тайёргарликлар 2023 йил пойтахтимизда бўлиб ўтадиган жаҳон чемпионатини қабул қилишга қаратилган. Ўзбекистон илк бор бокс бўйича эркаклар ўртасидаги дунё биринчилигига мезбонлик қилади. Давлатимиз раҳбарининг бевосита спорт соҳасида олиб бораётган ислоҳотлари, мамлакатимизда йирик мусобақаларни ўтказиш бўйича берган топшириқ ва тавсиялари натижасида бу йил биринчи маротаба оғир атлетика бўйича катталар ўртасидаги жаҳон чемпионати пойтахтимизда бўлиб ўтади. 2022 йил илк бор дзюдо бўйича катталар ўртасидаги дунё биринчилиги юртимизда ўтса, 2023 йил айтиб ўтганимиздек жаҳоннинг энг кучли боксчилари пойтахтимизда жам бўлади. 2025 йил эса Ўзбекистон биринчи марта ёшлар ўртасидаги Осиё ўйинларига мезбонлик қилади. Мана шу мусобақалар бевосита мамлакатимизнинг халқаро майдондаги имиджини янада мустаҳкамлашига ишонаман.

Бевосита бокс федерациянинг стратегик режаларига тўхталадиган бўлсам, мақсадимиз Ўзбекистоннинг жаҳон боксидаги етакчилигини мустаҳкамлаш, юртимиз ёшлари орасида кучли селекция сиёсатини юритиш, AIBA ҳамда Осиё бокс конфедерацияси билан изчил ва самарали алоқаларни ривожлантириш, халқаро тоифадаги ҳакамларимиз сонини кўпайтириш ва мураббийлар малакасини ошириш масаласини устувор вазифа сифатида кўрмоқдамиз.

Бизнинг энг катта ютуғимиз – давлатимиз ва ҳукуматимизнинг жисмоний тарбия ва спортга қаратаётган эътибори, мамлакатимизда соғлом турмуш тарзининг кенг тарғиб қилиниши, аҳоли саломатлигини мустаҳкамлаш борасида олиб борилаётган ислоҳотлар деб биламан. Бундан унумли фойдаланиб, кўпроқ ёшларга эътибор қаратишимиз, янгидан янги чемпион ўғил-қизларни тарбиялашимиз керак. Чарм қўлқоп усталаримизнинг халқаро ареналарда қўлга киритаётган ютуқлари ортидан юртимизда бокс билан шуғулланиш истагида бўлган ёшлар сони кун сайин ортиб бормоқда. Ҳар бир ёшдаги терма жамоамизда бугунги кунда жуда кучли рақобат шаклланган. Бу ҳолат эса фақат ўсишга, кучли жамоа шакллантиришга, натижаларни яхшилашга хизмат қилади.