Самарқанд шаҳрида “Samarkand half marathon” хайрия тадбири ўтказилади

Мазкур тадбирнинг аҳамиятли жиҳати шундаки, унда юртимизда саёҳат қилиб юрган туристлар ва имконияти чекланганлар, шунингдек, 20 га яқин давлатлардан келган иштирокчилар ҳам қатнашади. Ҳозиргача бу хайрия тадбирида иштирок этиш учун 3 мингга яқин марафончилар мусобақа бадалини тўлаган. Тадбирдан тушган хайрия маблағига кўзи ожиз инсонлар учун тифлошарҳлаш (кўзи ожизлар учун маълумотни қабул қилиш имконини берувчи усул) ёрдамида спектакль саҳналаштирилади.

Лойиҳага биноан ярим марафонда иштирокчилар 21, 10 ва 2 км масофага югуради. Бу масофаларга югуриш орқали иштирокчилар Самарқанд шаҳридаги 18 та тарихий обидани кўрадилар.

Белгиланган вақтда маррага келган иштирокчиларга шу жойнинг ўзида медаль ва эсдалик совғалари топширилади ҳамда 1-3 ўринларни қўлга киритган иштирокчилар пул мукофотларига ҳам эга бўлишади.

Шунингдек, 3 кунлик тадбир давомида тасвирий санъат асарларининг тактил (қўл билан ушлаб ҳис қилиш мумкин бўлган) кўргазмаси ташкил қилинади ва “Beat films” кинофестивали билан ҳамкорликда ҳужжатли кинофилмлар намойиши ўтказилади.