Самарқандда Осиё чемпионати якунланди + ФОТО

Иккинчи кунги баҳсларда иштирокчилар 10 километр масофага сузишда совринли ўринлар учун кураш олиб боришди. Анъанага кўра, биринчи бўлиб стартга эркаклар чиқишди. Мазкур мусобақада жами 21 нафар спортчи баҳсларга киришдилар. Улар орасидан уч нафар спортчимиз – Абдужалил Абдуғаниев, Никита Корнилов ва Бекмурод Кенжаев ўрин эгаллашди.

Қизғин кечган баҳсларнинг якунларига кўра биринчи бўлиб маррага япониялик Таишин Минамиде етиб келди. У белгиланган масофани 1 соату 58 дақиқа 21.2 сонияда сузиб ўтди. Кумуш медални Хитой Тайпейи вакили Чо Ченг Чи (1 соат 58 дақиқа 21.5 сония) қўлга киритган бўлса, кучли учликка кунчиқар юртнинг яна бир спортчиси Таики Нонака якун ясади. Ўн километр масофани у 1 соату 58 дақиқа 35.8 сонияда сузиб ўтди.

Ҳамюртларимиз орасида энг яхши кўрсаткичга Никита Корнилов эришди. Иқтидорли спортчимиз белгиланган масофани 2 соату 20 дақиқа 40 сонияда сузиб ўтиб, 13-натижани қайд этди.

Хотин-қизлар ўртасидаги мусобақаларда жами 15 нафар спортчи баҳсларга киришди. Мазкур мусобақада энг юқори натижа (2 соату 07 дақиқа 27.2 сония)ни қайд этган Хитой Тайпейи вакиласи Ю Вен Тенг Осиё чемпионидек шарафли номга сазовор бўлди

Тақдирлаш маросимида Осиё сузиш федерацияси Бош котиби Таха Ал-Кишри, Ўзбекистон спортни ривожлантириш вазирининг ўринбосари Шаҳрулло Маҳмудов, Ўзбекистон сузиш федерацияси раҳбарияти иштирок этишди.

Шу тариқа, очиқ сув ҳавзасида сузиш бўйича Х Осиё чемпионати баҳслари якунланди.