Самбо: Жаҳон кубогининг илк кунида 8 та медаль!

Ушбу нуфузли мусобақада мезбонлардан ташқари Арманистон, Беларус, Молдова, Ўзбекистон, Тожикистон, Туркманистон, Қирғизистон, Хитой, Бахрайн, Руминия, Сербия, Хорватия, Винесуэла каби 14 та мамлакатдан жами 130 нафардан ортиқ спортчи ғолиблик учун баҳс олиб боришмоқда. Улар орасида 13 нафар Ўзбекистон миллий терма жамоа аъзолари ҳам бор.

Илк кунги баҳсларда вакилларимиз 2 та олтин, 4 та кумуш ва 2 та бронза, жами 8 та медалга сазовор бўлишди. Жумладан, ҳамюртларимиздан Давлатжон Ҳамроев (-62 кг) олтин, Улуғбек Рахмонов (-82 кг) кумуш, Суннат Абдумажидов (-82 кг) бронза медалига сазовор бўлишди.

Аёллар ўртасидаги баҳсларда эса Ибодатхон Оғажонова (-60 кг) ўз вазн тоифасида кумуш, Дилноза Зияева эса (-52 кг) бронза медалини қўлга киритиб, Жаҳон кубогида юртимиз шарафини муносиб ҳимоя қилишди.

Шунингдек, жанговар самбо йўналишида Ўзбекистон терма жамоаси аъзоси Дилшод Гадоев 57 кггача вазн тоифасида шоҳсупанинг энг юқори поғонасига кўтарилган бўлса, унинг жамоадошлари Эрали Абраев (-90 кг) ҳамда Ҳакимжон Исмоиловлар (+100 кг) ўз вазн тоифаларида кумуш медаль билан тақдирланишди.