Сергей Фомин Анталия турнирида финалга чиқди

Мукофот жамғармаси 15 000 долларни ташкил этувчи ушбу мусобақада ҳамюртимиз Сергей Фомин ҳам ўз омадини синаб кўрмоқда. Мамлакатимизнинг иккинчи ракеткаси биринчи даврада турнирнинг иккинчи ракеткаси, нидерландиялик Макс Хуксни 6/4, 5/7, 6/1, 1/8 финалда аргентиналик Лучо Карневаллени 6/2, 6/1, 1/4 финал эса россиялик Денис Клокни 7/5, 6/2 ҳисобида мағлубиятга учратган эди.  

Фомин бироз аввал якунига етган 1/2 финал учрашувида россиялик яна бир теннисчи Евгений Тюрневни ортиқча қийинчилик таслим этди - 6/2, 6/3. Бугуннинг ўзида ҳамюртимиз мусобақа бош соврини учун кортга чиқади. Унинг финалдаги рақиби қозоғистонлик Дмитрий Попко бўлади. Попко ярим финалда рейтингда ўзидан роппа-роса 100 поғона юқорида бораётган британиялик Жей Кларкдан 6/4, 6/1 ҳисобида устун келди.    

Таққослаш учун, Фомин ATP рейтингида 728, Хукс 355, Карневалле 1120, Клок 564, Попко эса 504-ўринни эгаллаб турибди.