Сергей Фомин Manama Challenger 125 саралаши финалида уч сетлик учрашув ўтказди

Мусобақанинг саралаш баҳсларида ҳамюртимиз Сергей Фомин ҳам ўз омадини синаб кўрди. Мамлакатимизнинг биринчи ракеткаси 1/2 финалда саралашга имтиёзли чипта асосида қўйилган, италиялик рейтинги йўқ теннисчи Энрико Балдиссеррини 6/1, 6/2 ҳисобида мағлуб этганди. 

Афсуски, Фомин саралашнинг асосий тўрга йўлланма берувчи финал учрашувида болгариялик Димитар Кузмановга уч сет натижасига кўра имкониятни бой бериб қўйди. Биринчи сетни осонликча ўз фойдасига ҳал қилган ҳамюртимиз якунда мағлубиятга учради. Саралашда учинчи рақам остида сараланган, дунёнинг 266-ракеткаси бўлиб турган Кузманов камбэк амалга оширди - 1/6, 6/3, 6/1. 

Таққослаш учун, Сергей Фомин саралаш турнирида саккизинчи рақам остида таснифланган бўлиб, айни пайтда ATP рейтингида 338-поғонадан жой олган. Теннисчимиз 2 соату 2 дақиқа давом этган баҳс мобайнида 2, Кузманов 8 та эйс зарбасини амалга оширди. Ҳамюртимиз учун бу турнир ҳам омадсиз якунланди.