Сергей Ковалёв Альварес билан реванш жанги ўтказади

Россиялик боксчи биринчи жанг шартномасидаги реванш жангини ўтказиш ҳақидаги банддан фойдаланмоқчи эканлигини маълум қилди. Бу маълумотни Ковалёвнинг менежери Эгис Климас ҳам тасдиқлади. Климас ҳамюртимиз Фазлиддин Ғоибназаровнинг ҳам менежери ҳисобланади. 

“Ҳа, Сергей реванш жанги ўтказилишини истаяпти. У бошқа жанг ҳақида ўйламаяпти ҳам”, - деди Климас ESPN телеканалига берган интервьюсида.

Эслатиб ўтамиз, ўзбекистонлик мураббий Аброр Турсунпўлатов қўл остида машғулот ўтказаётган Сергей Ковалёв 4 август куни Атлантик-Сити шаҳрида Альваресга еттинчи раундда техник нокаут эвазига мағлуб бўлганди. 

Маълумот учун, нокдаун ҳолатига қадар россиялик боксчи очколар ҳисобига кўра олдинда бораётган эди. Реванш жанги 2019 йилнинг февраль ойидан олдин ўтказилмаслиги аниқ.