Сехудонинг аниқ "томи" кетибди, у энди Валентина Шевченкони жангга чорлади

Бу сафар америкалик жаҳон чемпиони аёллар ўртасида енгил вазнда UFC чемпиони, қирғизистонлик гўзал Валентина Шевченкони октагонга чорлади. Шевченко куни кеча ўз чемпионлик камарини иккинчи маротаба ҳимоя қилган эди. 

"Енгил вазн тоифаси қироличаси Валентина Шевченко билан октагонда тўқнаш келишни истардим. Чунки унда "олтин" бор. Мен эса енгил вазндаги барча чемпионлик олтин камарларини ўз қўлимда бирлаштирмоқчиман. Бу билан ҳам эркаклар, ҳам аёллар ўртасида чемпион бўлиш бўйича биринчи жангчига айланаман. Шевченко, мен сени жангга чорлайман. Сен кейингисисан", - дея Твиттер саҳифасида хабар қолдирган эркин кураш бўйича Олимпиада, икки вазнда UFC чемпиони Сехудо.

Эслатиб ўтамиз, бир муддат аввал Генри Сехудо аёллар ўртасида икки вазн тоифасида UFC чемпиони, бразилиялик Аманда Нуньесни ҳам октагонда жанг қилишга чорлаган эди.