Шаҳрам Ғиёсов навбатдаги жанги олдидан фикрларни билдирди

Мазкур баҳсда ҳамюртимизга собиқ жаҳон чемпиони, колумбиялик Дарлейс Перес рақиблик қилади. 

Ушбу жанг олдидан Шаҳрам Ғиёсов ўз фикрларини билдириб ўтди. 

"9-жангимга бир ҳафта вақт қолди. Насиб қилса, чоршанба куни мураббий ва менежерларимиз билан Мексикага жўнаб кетяпмиз. Айни пайтда трансляция масаласида иш олиб борилмоқда. Яқин орада бу борада янгиликлар бўлади. 

Тайёргарлик жуда яхши ўтди. Спарринглар бўлди. Меҳнатни охиригача қилдик. Энди Худо хоҳласа ушбу меҳнатни роҳатини кўрамиз. Ғалаба қозониб, Ўзбекистонимиз байроғини кўтарамиз. 

Бу ҳимоя жангим бўлади, 10 раундга мўлжалланган. Рақибим жуда кучли боксчи. Икки карра жаҳон чемпиони, Олимпиада иштирокчиси. Жанг қизиқ бўлиши кутилмоқда. Насиб қилса, дуо қилиб турсангиз юртимизга ғалаба билан бораман", - деди Шаҳрам Ғиёсов Ўзбекистон профессионал бокс федерацияси матбуот хизматига берган интервьюсида.

Эслатиб ўтамиз, Шаҳрам айни пайтда WBA International камари соҳиби ҳисобланади.